Laespadaren hitzetan: "Enpresa-sektoreekin bertatik bertara lan egiten dugu haien eskaerak identifikatzeko."

Enplegua, Gizarte Kohesioa eta Berdintasuna Sustatzeko Sailak sustatutako LABORLAN enplegu eta prestakuntzako programa mistoak aurreinskripziorako beste fase bat ireki du (martxoaren 24ra arte), portaldeempleodebizkaia.eus, helbidearen bidez, aurreko edizioetan 280tik gora pertsonari laneratzen lagundu ondoren.

Programa hori Enplegu eta Ekintzailetza Foru Agentziarekin (DEMA) batera garatzen da, hainbat kluster eta enpresa-elkarterekin lankidetzan, eta, abian jarri zenetik, 550 pertsonari baino gehiagori prestakuntza eman zaie, eta 50etik gorako laneratze-tasa lortu da.

LABORLANek sektoreko enpresetan prestakuntza teknikoa, konpainia-zerbitzu integrala, lan-aktibazioa eta lanbide-esperientzia konbinatzen ditu, eta kalitateko enpleguak lortzeko behar diren tresnak eskaintzen ditu Bizkaiko ekonomian funtsezkoak diren sektoreetan, hala nola eraikuntzan, ingurumenean, makinerian eta teknologian.

LABORLAN etengabe aldatzen ari den lan-merkatuaren beharrei emandako zuzeneko erantzuna da, enplegua lortzeko zailtasun handiagoak dituzten kolektiboentzat benetako aukerak sortzen baititu. Enpresa-sektoreekin bertatik bertara lan egiten dugu, haien eskaerak identifikatzeko eta parte-hartzaileen enplegagarritasuna bermatuko duen prestakuntza egokitua eskaintzeko, azaldu du Teresa Laespada ahaldun nagusiorde eta Enplegua, Gizarte Kohesioa eta Berdintasuna Sustatzeko foru diputatuak.

Sortu zenetik, programa lan-merkatuaren inguruabarretara egokitu da, Bizkaiko Foru Aldundiko Enplegua, Gizarte Kohesioa eta Berdintasuna Sustatzeko Sailaren kudeaketaren pean, eta DEMAk (Enplegu eta Ekintzailetzako Foru Agentzia) programa gauzatzeko ardura duen agentzia gisa diharduela. Enpresa-klusterrekin lankidetzan aritzea funtsezkoa izan da prestakuntzaren edukiak diseinatzeko, LABORLANek Bizkaiko garapen ekonomikorako estrategikoak diren sektoreen eskaerei zehatz-mehatz erantzun ahal izateko.

Etorkizuneko lan-merkatuaren joerekin bat datorren prestakuntza

LABORLANen sektore garrantzitsuenen artean eraikuntza, ingurumena, makineria eta teknologia nabarmendu behar dira, Bizkaiko hazkunde ekonomikorako funtsezko arloak baitira. Sektore horiek lotura estua dute Trantsizio Hirukoitzarekin (digitala, ekologikoa eta soziala), eta horrek ziurtatzen du prestakuntza etorkizuneko lan-merkatuaren joerekin lerrokatuta egongo dela.

Adibidez, ingurumen-sektorearen bidez, jakin genuen teknikari espezializatuen beharra zegoela eta teknikariok alderdi teknikoez gainera arlo horretako Europako araudia ere ezagutu behar zutela. Horri erantzuteko, prestakuntza-programa espezifikoak diseinatu genituen eskaera zehatz horri erantzuteko, gaineratu du Laespadak.

Bost ibilbide

Orain aurreinskripzioa egiteko ireki den edizioak bost ibilaldi eskaintzen ditu:

• Eraikuntzako makineria mantentzea eta konpontzea. 
• Trantsizio ekologikorako ingurumen-arloko araudia.
• Eraikinak modu jasangarrian birgaitzea.
• AAn eta Pythonen espezializatutako web programazioa.
• Disenu teknikoa Revit eta E3D Piping bidez. 

Zehazki, ibilbide horiek entitate hauen lankidetzarekin garatzen dira: ASCOBI/BIEBA (Bizkaiko Higiezinen Eraikitzaile eta Sustatzaileen Elkartea), GAIA (Euskal Herriko Ezagutza eta Teknologia Industrien Elkartea), AVE-BIE (Bizkaiko Induskari Elkartea) eta ACLIMA (Ingurumeneko Industrien Euskadiko Kluster Elkartea).

LABORLANen ezaugarria da kolektibo kalteberei zuzendutako ikuspegi inklusiboa duela; kolektibo horiek; besteak beste, 45 urtetik gorako pertsonak, iraupen luzeko langabeak eta kalteberatasun-egoeran dauden gazteak dira. Programak prestakuntza pertsonalizatua eskaintzen du, lan-merkatuan sartzea errazteko, eta enplegu-aukera berriak irekitzen dizkie gehien behar dutenei.

LABORLANi esker, lan-merkatuan sartzen den pertsona bakoitzak bere bizi-kalitatea hobetzeaz gainera, Bizkaiko enpresa-sarea hazten eta indartzen ere laguntzen du. Programak argi erakusten du administrazio publikoen eta sektore pribatuaren arteko lankidetzak aukera jasangarriak sor ditzakeela, garapen ekonomikoa zein gizarte-kohesioa bultzatzeko, esan du Laespadak.

Ibilbide finkatua duelarik, LABORLANek lan-merkatuaren eskari berrietara egokitzen jarraitzen du, enpresek zein langileek Bizkaiko oparotasun ekonomikoa sustatzeko behar diren tresnak dituztela ziurtatuta.