Agerkaria
31. alea
2008ko ekaina
IKT tresna berriak euskaraz, ekoizpena hobetzeko
Ekainaren 25ean Miramongo Parke Teknologikoan egin zen "IKT tresna berriak euskaraz, ekoizpena hobetzeko" ekitaldian aurkeztu zituen Microsoftek bere produktu berriak, Windows Vista sistema eragilearen eta Office pakete berrienaren euskarazko bertsioak. Teknologia ahalik eta pertsona gehienen eskuetara heldu dadin, haien beharrak asetze aldera, eta IKTek euskal hiztunen hizkuntzan "hitz egin" dezaten eskaera hazkorrarekiko bere konpromisoa erakutsiz, Microsoftek inbertsio ahalegin garrantzitsua egin du softwareko bere azken produktuak euskarara egokitzeko. Hori gauzatu ahal izateko, Eusko Jaurlaritzako Kultura Sailaren eta Hizkuntza Politikarako Sailburuordetzaren euskarria izan du lagun, hizkuntza eta terminologia gaien inguruan aholkularitza jasoz, eta hizkuntza honetan eginiko interfazeen lehen bertsioen ebaluazioan elkarlanean arituz. Ahalegin honekin bat egin dute Informazioaren eta Komunikazioaren Teknologien sektorean lider diren Dell, Inves eta HP konpainiek.
IKTen bitartez euskararen zabalkundea bultzatzeko konpromisoari ekarpen berria eginez, Microsoftek gaur egun merkatuan dituen bere bi produktu izarren interfazeak euskaraz eskuratu daitezkeela iragarri du: Windows Vista sistema eragilea eta Microsoft Office 2007 suite ofimatikoa. Honako interfazeak doan eta modu erraz eta seguruan deskargatu daitezke Microsoftek horretarako propio eskainitako webgunetik, www.microsoft.es/eus.
Euskarazko informatika ahalik eta hiritar-kopuru zabalenera irits dadila bermatzeko, Microsoftek adierazi du Klik egin euskarari izeneko kanpaina abiaraziko duela. Kanpaina hau ekainaren 25ean jarri zuten martxan eta udan zehar luzatuko da, irailaren 1a bitarte.
Kanpainaren helburua da, hain zuzen ere, herritarrek euskarazko interfazeen ahalik eta instalazio-kopuru handiena egitea, bai Windows Vista eta Microsoft Office 2007 erabiltzen dituztela, bai programa hauen bertsio zaharragoak erabiltzen dituztela ere. Euren inguruan deskarga gehien "sortzea" lortzen dutenek teknologiaren munduarekin zerikusia duten sari interesgarriak jasoko dituzte, besteak beste, azken belaunaldiko hainbat ordenagailu.
Menuak eta Kartak euskaraz
Menuak eta kartak euskaratzeko itzultzaile automatikoa sortu eta interneten eskuragarri jarri du Donostiako Euskararen Udal Patronatuak.
Menu bihurgailua taberna, jatetxe zein edozein etxetako menuak eta kartak gaztelaniatik automatikoki euskaratzeko tresna informatikoa da. Tresna hau Euskararen Udal Patronatuak ostalari eta merkatarientzat sortu zuen merkatari.net atarian dago, eta ostalari eta sukaldariek gehien erabiltzen dituzten plater eta menu izenak euskaratzeko gai da. Egitasmo berria da, ez baitzegoen orain arte menuak eta plater izenak gaztelaniatik euskarara ekartzeko internet bidezko tresnarik.
Dijitalidadea S.L enpresak sortu duen menu bihurgailuak 1.057 termino eta horien eratorriak biltzen ditu. Termino edo sarrera horiek multzo funtzionaletan banatuta daude, hau da, esaldia osatzeko osagaiek duten portaera berezitua aintzat hartuta banatu dira:
• Osagai nagusiak: txuleta, karramarroa
• Hitz anitzeko terminoak: baratxuri berdea, zizka-mizkak aukeran
• Adjektiboak: ketua, krematsua, etxekoa
• Aditzak: gozatua, irin-arrautzeztatua
• Jakien zatiak: saiheskia, hanka, muina
• Prestaera moduak: entsalada, ogitartekoa
• Gehigarriak: olioa, bainilla, maionesa
Menu bihurgailua edonork erabili dezakeen arren, euskaraz jakin edota ulertzen duten ostalari eta tabernariei zuzenduta dago bereziki. Euskara ezagutzen ez dutenek erabiliz gero, komeni da tresnak proposatutakoa euskaraz dakien norbaitek berrikustea. Menu bihurgailuak menu eta jaki ugari gaztelaniatik euskarara itzultzen duen arren, tresna mugatua da, zailtasuna areagotzen den heinean erantzuna jasotzeko aukera txikiagoa da.
Euskal Hizkuntzalaritza eta Filologiako graduondokoa
Alderdi teorikotik nahiz praktikotik hainbat gai jorratuko dira: hizkuntza plangintza, hizkuntzaren irakaskuntza, psikolinguistika eta euskararen prozesamendua, itzulpengintza eta semantika, diskurtsoaren analisia, soziolinguistika, euskararen historia eta jatorria, Veleiako berri, euskararen berreraiketaren teknikak, euskal onomastika, historiografia linguistikoa eta euskal gramatika zaharrak, euskal testu zaharrak, euskal literatura zaharra eta garaikidea, euskalkiak eta dialektologiaren azterbideak, fonologia, morfosintaxia, semantika eta gramatikako atalen arteko interfazeak, besteak beste.
Egitarauaren xedea Euskal Hizkuntzalaritza eta Filologiako ikertzaile profesionalak trebatzea da. Ikastaroa egiten duten ikasleak, doktoretza-tesi bat egin ahal izateko edo euskal gaietan kalitatezko beste zernahi ikerlan egiteko beharrezko diren gaitasunaz, trebakuntzaz eta ereduez jabetu daitezela bilatzen da graduondokoan. Ikaslearen prestakuntza zientifiko eta teknikoan sakontzea da helburua, ikerlan esperimentalak ontzeko gaitasuna eta metodoak garatzea, horretarako guztirako baliagarri diren alderdietan prestakuntza hobetzea.
Aurreinskripzioa egiteko EHUren Arabako errektoreordetzara deitu behar da uztailaren 11 baino lehen. Behin betiko izen ematea irailean izanen da.
IV. Inkesta soziolinguistikoa
Eusko Jaurlaritzako Kultura Saileko ordezkariek IV. Inkesta Soziolinguistikoaren emaitzak aurkeztu zituzten ekainaren 18an, Donostiako Kursaalen egindako aurkezpenean.
Ikerlan horrek helburu dauka Euskal Herriko egoera soziolinguistikoa aztertzea eta, horretarako, hizkuntza-gaitasunaren, euskararen erabileraren eta horiek sustatzearen aldeko jarreren gaineko galderak egin dira.
Inkestak euskararen lurraldeetako hamabost urtetik gorako biztanleak hartzen ditu aintzat (gutxi gorabehera, 2.500.000 lagun), sexuaren nahiz adinaren arabera taldekatuta. Guztira, 7.200 inkesta egin dira galdetegi egituratu eta itxi baten bidez.
IV. Inkesta soziolinguistikoaren datuak batzen dituzten liburuak euskara zerbitzuan jasoko dituzuen arren, dagoeneko IV. Inkesta Soziolinguistikoa osorik (pdf, 1,39MB) eta hari lotutako grafikoak (pdf, 839kb) eskura ditzakezue EJren Kultura Sailaren web gunetik.Bermeoko Euskalgunea
Bermeon euskararen normalizazioan hainbat arlotan lanean ari diren elkarteen topalekua egin dute, Euskal Gunea izenekoa.
Egunez egun eta gizartearen arlo denetan bermeotarrak euskaraz bizitzeko lanean ari diren hainbat elkarteri lekua egin gura izan die Udalak eta horretarako Ataldeko lokalak eraberritu ditu. Hainbat elkarte eta proiektuk izango dute euren tokia Euskal Gunean. Elkarteen lekua ez eze, herritarrak euskalduntzeko lekua ere izango da, horretarako Bermeoko euskaltegi biak kokatuko dira bertan; Berbalagunek ere bertan izango du bulegoa. Euskeraz Berbetan elkarteak bertan jarraituko du eta Busturialdeko Hitzak erredakzioa eta bulegoa bertan kokatuko ditu.
2008ko Mintza Eguna Getxon
2008ko ekainaren 14an, Euskal Herriko bazter askotako mintzalagunak bildu ziren Getxon, III. Mintza Eguna ospatzeko xedez. Gutxi-asko, 230 berbalagunek parte hartu eta gozatu zuten Getxoko Udalaren Euskara Zerbitzuak, Egizu taldeak eta Topagunekoek antolatutako ekintzez.
