saltatu edukira

Aldundiaren Logoa
 
 

Hemen zaude:

Kobie

Informazioa

Kobie Kobie logoa

AURKEZPENA

Kobie aldizkaria 1969an sortu zen, Bizkaiko Foru Aldundiak babestuta eta finantzatuta, Bizkaiko Espeleologia Taldearen buletin gisa. Ildo editorial berri bat ireki zen horrela, Nestor de Goikoetxea y Gandiagaren zuzendaritzapean, Geomorfologiarekin, Hidrologiarekin, Historiaurrearekin edo Arkeologiarekin zerikusia zuten gaien hedapena sustatzen zuena. Helburu horri begira jarraitu zen lanean 1984ra arte, urtean zenbaki bat argitaratuz, harik eta erabaki zen arte, aldizkariari egindako harrera ona ikusirik, argitalpena bi sailetan banatzea: Paleoantropologia (1985etik orain arte) eta Natura Zientziak (1985etik 1995era bitartean), eta beste bi sail berri eranstea: Arte Ederrak (1983tik 2001era bitartean) eta Antropologia Kulturala (1987tik orain arte); hori guztia Ernesto Nolte y Arambururen zuzendaritzapean. Egoera horrek 2009ra arte iraun zuen, eta orduan Bizkaiko Foru Aldundia Kobie aldizkariaren jabe egin zen. Aldundiko Kultura Ondarearen Zerbitzuak kudeatzen du zuzenean aldizkaria.

Kobie aldizkariaren etapa berri bat hasi da 2010etik aurrera; hobetu egin dira denboraren buruan zaharkituta geratu diren alderdiak, eta edukien kontsulta bizkortu duten berritasunak erantsi dira. Ildo horretatik, 2013ko ediziotik aurrera, irakurleek Kobie aldizkariaren sail eta monografia guztiak eskura dituzte helbide honetan: http://www.bizkaia.eus/kobie.

Ez genituzke lerro hauek amaitu nahi Kobie aldizkariaren zuzendaritzak eta erredakzio kontseiluak lau hamarkadatik gorako tartean egindako lana eskertu gabe. Euren ahalegin zintzoari zor zaio argitalpenaren etapa berri hau.

Era berean, atsegin handiz euren fideltasuna eskertzen diegu bai urte hauetan zehar Kobie aldizkariaren lankide izan diren egileei eta baita irakurleei ere, azken batean eurek ahalbidetu baitute proiektu hau.

Josune Ariztondo Akarregi
Kulturako foru diputatua.